الصحافة _ رضا باهات
عبد اللطيف وهبي الأمين العام لحزب الأصالة والمعاصرة، يُصر على المزايدات السياسية التافهة وْدير البهرجة الخاوية ولوْ فزمن كورونا. آييهْ السيد فاق مع الصباح كلف من أسماه بخبراء الحزب باش يديرو دراسة موضوعية وواقعية لحجم تأثيرات فيروس “كورونا” على الوضعية العامة ببلادنا، ومن خلالها رسم رؤية استشرافية لمستقبل بلادنا ما بعد أزمة كورونا، خاصة على المستوى الاقتصادي.
واش دابا البام حزب سياسي ولا مكتب دراسات وْلا مركز بحثي ديال البحوث؟.. هادشي كيدل أسي عبد اللطيف وهبي أنه ماعندكومش رؤية سياسية أبداً سواء خلال مرحلة تدبير جائحة كورونا أو لمرحلة ما بعد الجائحة.
حزب الإستقلال وحزب الإتحاد الإشتراكي هوما لي عندهم رؤية سياسية من بينْ هادْ العرامْ ديال الأحزاب لي كيلهفو المال العام ويتسابقوُ على الديور فْالحملات الإنتخابية وْبلا فائدة. قراوْ المقالات والحوارات ديال القياديين ديال حزب الإستقلال، كتلاقا عندهم رؤية سياسية حقيقة لهاد الظرفية العصيبة لي كتمرٌ منها البلاد، لأنهم قراو الإقتصاد ديال بالصحٌ وْمكونين وعندهم ما يقولو.
والشأن نفسه بالنسبة للقياديين ديال الإتحاد الإشتراكي، الخرجات سواء ديال فتح الله ولعلو أو ديال ادريس لشكر ومركز الظرفية الإقتصادية لي رئيس ديالو الحبيب المالكي، كتلقا عندهم مواقف ورؤئ سياسية واقتصادية قوية، ماشي بحال الأصالة والمعاصرة والعدالة والتنمية لي معندهم والو غير البلا بْلا، فقط باستثناء الرد لي دار ادريس الأزمي على مقال عزيز أخنوش لي كانت شيئا ما إيجابية، أما الحركة الشعبية والإتحاد الدستوري والأحزاب الأخرى مكايناش أصلاً..
الأمين العام لحزب الأصالة والمعاصرة كايجي دابا كيقولك كلف الخبراء باش يديرو الرؤية السياسية. آسي وهبي نتا ما مطلوبش منك تعطينا 5 فالمئة ديال نسبة النمو و3 فالمئة ديال الفائدة، ونقصو هنا ونزيدو هنا، انت مامطلوبش منك هادشي آسي وهبي، أنت راك حزب سياسي مطلوب منك رؤية سياسية لأولويات الدولة لمرحلة ما بعد كورونا، يعني كيفاش كتشوف الإقتصاد ونبداو بالفقراء ولا بالمقاولات، واش نبداو بالسياحة ولا نبداو بالتصنيع وْلا نبداو بالفلاحة.
عطينا آسي وهبي رؤى سياسية واجتماعية وثقافية…، وْقلنا علاش وشرح وفصل مع الدولة والشعب، ماشي تحول تنظيم حزبي إلى مكتب دراسات وتقولنا غانكلف الخبراء يوجدو المقترحات ونقولكم، مامطلوبش منك انت هادشي كاع (..) انت غير طلع فوق المنصة وقول للناس ها المغرب لي كنشوف فمرحلة بعد مرور جائحة كورونا هو للطبقات المعوزة والمتوسطة والزيادة فالأجور ووو.
عطينا آسي وهبي الرؤية السياسية ديالك لي كتآمن بها أنت كزعيم حزبي، وكفكر وكإديولوجية وكمرجعية ديالك، وقناعات راسخة عندك لداخل.
آسي وهبي، هاد البيان لي درتي راه مجرد مزايدات سياسية تافهة كيدل على أنك كادير البهرجة فزمن كورونا، وْخاصك تحط لينا رؤية سياسية وْدافع عليها مع الدولة وتوضحها للشعب وتقولو ها الأولويات ديالك باش تطفي الغضب وتخلق الأمل والرابط بين الشعب والدولة، ماشي مطلوب منك تصاوب لينا الخزعبالات لي غايصوبوهم دوك الخبراء لي عندك باك+6 كاع.
آس وهبي، الدولة غنية عن الدراسات الاقتصادية راه خاصها طرق التصريف السياسي لقرارات الإقلاع بعد تحديد أولويات السياسات العامة.
