بقلم: عبد المجيد مومر*
وَا وْلاد الشعب
نَاري نَاري
قُولُو مْعايَا ،
ناري ناري
فَاتِي فْلور جايَّة،
مْحَزْمَة كاتَشْطحْ،
تْغَنِّي شَعبُولاَّ رْبَحْ،
ناري ناري !
بُولِتِيكْ التْشَرميلْ ،
فَاتِي هَازَّا لَمْضَا،
الرئِيسَة نَاوْية تَدبَح !
هَذا عَرس أوْ خْتَانَة ؟
دَايْرَة شَعبانَة
عَارضَة وْ بَاغَة تَذْبَح
لِينَا لْخَرفانْ؟
لاَّ .. لاَّ
باغْيَة تَذبَحنِي أنَا!
كَاتْقَلَّبْ على لْعَنوانْ،
إِِيوَا قُولو لْفَاتِي :
أَنَا المُلاَّ مُومَر !
لْحَمْري تْرَابْ التِّيرانْ،
فَاكْ شَعْبُولاَّ ،
فَاكْ عِصابَة الإِخوانْ،
أ رْجَعْ .. أَ رْجَعْ !
نْعَاوَد ليكُم
أشْ وْقع؟
شَفْتُو فاتِي فْلُور!
رَ مْرَكْبَة لَشْفَار،
صَابْغَة الشْعَر !
رَ مْرَكْبَة ظْفَار،
هادِي مولاتْ
لَخْلاَخَلْ!
بْكاتْ في الصَّالَة
للْدَاخَلْ!،
نَتْفَاتْ الراسْ،
نَدْبَتْ لَحْنَاكْ ،
خَسْراتْ المِيكَابْ!
كُوكُو شَانيلْ ؟
سَرقو لِيهَا الصَّاكْ!
حَشَّمْتُوها قُدَّامْ
الضْيَاف،
ناري السَّاطَة
حنٍينَة بَزَّافْ،
عَيْطات في التليفونْ،
وَا عَمّو المَخْزونْ،
آلو عمّو ..
عمّو فينْ ؟
الضْيَاف هَربُو
أَ عَمُّو الزّينْ !
تُوتْ أ بُّوسْطُو !
أَخْشِي شِي حاجَة!
الطَّرح سْخَنْ،
وَا خْشِي أَ بَنتْ الحَاجة،
أَخْشِي الشَّنْ !
جَا الميساجْ
شَنْ .. طَنْ،
كُلشِي انْسَحَبْ !
التَّعليماتْ وَلاَّتْ بِالفَنْ!
لاَ جلْسَة إِفْتِتاحِيَّة،
لاَ انْتِخاباتْ دِيمُقْراطِيَّة،
هَيْت جْديدْ هَذَا :
المُؤْتَمَر غير مَسْرَحيَّة،
اللِّي دَّاهَا يْدِّينَا!
دَّاها شَعْبُولاَّ :
وَسيطْ العدالة و التنمية!
دَّاهَا وْ دَّاهَا
الحداثَة خَلاَّهَا !
لاَيْ لاَري ..
لاَري .. لاَري،
أَنا غادِي نْجِيبْهُم
يَتْسَحرو مْعَ الدْرَارِي،
قَالِّيكُم المُفْتِي لَهْلالِي:
رَ السياسة
على منهاج النبوة،
وَاكْ دَلاَّلِي :
بْلاَصة .. بْلاَصة
طُوبيسْ الإيديُولُوجْيَا!
العْنْف و لْبُونْيَة و الفُتُوُّة،
أَخيرًا ثُبُوت النَّسَب،
التوحيد و الإصلاح!
إعْتَارفاتْ بِالبُنُوَّة،
الرَّضاعًة من نَفس لْبَزُّولَة
يالله كَتْبُو الأُخُوَّة،
أَ لالَّة زْهِيرو
مْنِينْ جاكْ الزَّلاَّطْ؟
سَعد مْعَ عَمُّو
في الرباط!
قَالَتْ لِيَّا :
أَشْ بِيتِي ؟
اللِّي بِيتُو مَا بِيتِيهْ!
أَنَا المُلاَّ مُومَر
دُوزي رَ الحَريمْ لْهِيهْ!
وَاشْ هاذي سياسة؟
هَذا لَخْواضْ بِعَيْنيهْ!
غادِي وَ نْعاوَدْ،
عَيْطُو للشَّاهَدْ،
أَجِي أَ وَلْد لَفْقيهْ،
أَشْ كَاتْقُول فْهاذْ الشِّي؟
رَ مُولْ لْكوتْشي
جَرَّا علَى كُلْشِي!
يَا مراكش يا وْرِيدَة،
المُعاصَرة :
صَفْقة فَريدَة،
الوَلَد للْفِراشْ
وَ نِعْم الأَصَالة!
أنَا الرِّيَّاشْ
بِالفِيلِيلْ نَاكُلْ غْلالَة!
واكْ واكْ
على حَالَة !
تْرَاكْتُور جَارُّو دِيبَّنَاجْ
بَانَتْ ليكم المَسْألَة!
المُخَطَّط الإستعجالي؟
لَفْلوسْ مْشاتْ!
الفَساد دُوبَلْ فِيراجْ!
حَالَة وَاشْمَنْ حالَة،
وَا وْلاد الشعب :
شْكون سبابْ البِطالَة؟
شْكونْ غَرَّقْ الشَّعب؟
شْكُون اللِّي خَلَّا
دْمُوعنَا سَيَّالَة ؟
وَا وْلاد الشعب:
طَيْحُو لاَمْبَة وَ تْراكْتُور!
عَاشْ الدستور!
هَذَا المَغرب اللِّي بْغِينَا !
مَغرب لحَدَاثة وَ العَدالَة!
*كاتب وشاعر مغربي.
